Ataul Hasan
rog main ne bhi ka.i jaan ko laga.e barson
jaane vaale bhi nahin lauT ke aa.e barson
aḳhirash taab mashaqqat ki na ankhon men rahi
main ne rozi ki tarah ḳhvab kama.e barson
dhuul jazbon ki haTa.i to ye ehsas hua
is mohabbat men shab-o-roz ganva.e barson
tu nahin tha to muqaddar bhi ghunuda hi rahe
Thokaren maar ke bhi ham ne jaga.e barson
us ki ankhon se kisi taur andhera na gaya
diip jis ke liye ḳhuun se bhi jala.e barson
ruuTh kar shahr-e-ḳhamoshan ko ga.e aate nahin
hichkiyan le ke koi chahe mana.e barson
main bhi sah paaya nahin teri juda.i ko ‘hasan’
aur is dil se bhi uThti rahi haa.e barson
Leave a Reply