na sharh-e-shauq na taskin jan-e-zar men hai
maza jo apni mohabbat ke e’tibar men hai
abhi se hosh na kho baiTh ai nasim-e-chaman
abhi to ek shikan zulf-e-tabdar men hai
ḳhud apne ishq ki ranginiyon men gum ho ja
nahin kuchh aur agar ye to iḳhtiyar men hai
ye mahviyat koi dekhe ki misl-e-a.ina
junun-e-ḳhud-nigari apne intizar men hai
na hai nasib mili aur ba-qadr-e-zarf mili
supurdagi ki jo ik shaan iḳhtiyar men hai
harif-e-bazm-e-tamasha tiri nigah nahin
vagarna husn to ḳhud tere intizar men hai
‘asar’ mujhe hai vahan ruḳhsat-e-nava-sanji
ki naghma ik lab-e-ḳhamosh jab dayar men hai
Leave a Reply