diya nasib men nahin sitara bakht men nahin
to kya sharar bhi vajud-e-sang-e-sakht men nahin
miri baqa ka raaz hai musafirat musafirat
so naqsh-e-pa baghair mere saz-o-rakht men nahin
mujhe hai shahr ke gharon se sirf is qadar gila
ki bhaai husn asman-e-lakht-lakht men nahin
mira kamal munhasir hai mere ikhtisar par
miri numu ka shaiba kisi darakht men nahin
faqir-e-shahr bhi raha huun ‘shahryar’ bhi magar
jo itminan faqr men hai taj-o-takht men nahin