Saleem Betab
phir tire qaul-o-qasam yaad aa.e
tiri chahat ke sitam yaad aa.e
kis qadar choT lagi hai dil par
jab bhi mar mar ke sanam yaad aa.e
yaad jab aaya tira naam mujhe
kitne be-nam se gham yaad aa.e
jaane vo kaisa safar tha mera
jis ka ik ek qadam yaad aa.e
phir mira zehn hai uljha uljha
phir tiri zulf ke ḳham yaad aa.e
aur bhi yaad ki lau tez hui
jab bhi chaha ki vo kam yaad aa.e
kaun ‘betab’ pukare ham ko
kis ko tanha.i men ham yaad aa.e
Leave a Reply