pher len ankhen muravvat dekhna
apni ulfat dekhna meri mohabbat dekhna
do hi din men kya se kya tum ho ga.e
aa.ine men apni surat dekhna
DhunDhne par bhi nishan milta nahin
mar miTun ki shan-e-ghurbat dekhna
aah se dar-parda us ko laag hai
aa.ine ki ye kudurat dekhna
daad mahjuri ki phir hai justuju
de na dhoka apni qismat dekhna
tauba karna to bahut asan hai
phir badal ja.egi niyyat dekhna
manzil-e-duniya nahin aram-gah
hai abhi roz-e-qayamat dekhna
kar le o saffak har jaur-o-jafa
rah na jaa.e koi hasrat dekhna
ka.abe se but-ḳhana men aa hi ga.e
khinch laa.i ‘shauq’ qismat dekhna
Leave a Reply