use bhi rabt-e-riha.ish tamam karna tha
mujhe bhi apna koi intizam karna tha
nigar-ḳhane se us ne bhi rang lene the
mujhe bhi shaam ka kuchh ehtimam karna tha
mujhe bhi kahni thi ik nazm us ke lahje par
use bhi ishq men kuchh apna naam karna tha
bas ek lunch hi mumkin tha jaldi jaldi men
use bhi jaana tha mujh ko bhi kaam karna tha
charagh jalte the jis ke ik ek aasan men
us ek raat ka kya iḳhtitam karna tha
koi kitab girani thi koi sandesa
kisi tarah to use ham-kalam karna tha
bas ek raat bhi guzri nahin vahan ‘mansur’
tamam umr jahan par qayam karna tha
Leave a Reply