lams ko chhoḌ ke ḳhushbu pe qana.at nahin karne vaala
aisi-vaisi to main ab tum se mohabbat nahin karne vaala
mujh se behtar koi duniya men kitabat nahin karne vaala
par tire hijr ki main jald isha.at nahin karne vaala
apne hi jism ko kal us ne miri ankhon se puura dekha
is se baḌh kar koi manzar kabhi hairat nahin karne vaala
maz.hab-e-ishq se mansub ye baten to ḳharij ki hain
sham-e-hijran main kisi taur main shirkat nahin karne vaala
aisi bhagdaḌ men koi paaon tale aa.e to shikva na kare
gir gaya main to koi mujh se ri.ayat nahin karne vaala
lau larazne ka koi aur hi matlab na nikal aa.e kahin
puchhne par bhi charagh aur vazahat nahin karne vaala
mujhe chalte hue raste ke shajar dekhte jaate hain ‘raza’
par mire saath ukhaḌ kar koi hijrat nahin karne vaala
Leave a Reply