Jahan Rehana Rahti Thi

yahi vaadi hai vo hamdam jahan ‘rehana’ rahti thi

vo is vaadi ki shahzadi thi aur shahana rahti thi

kanval ka phuul thi sansar se begana rahti thi

nazar se duur misl-e-nikhat-e-mastana rahti thi

yahi vaadi hai vo hamdam jahan rehana rahti thi

inhi sahraon men vo apne galle ko charati thi

inhin chashmon pe vo har roz munh dhone ko aati thi

inhi tilon ke daman men vo azadana rahti thi

yahi vaadi hai vo hamdam jahan ‘rehana’ rahti thi

khajuron ke tale vo jo khanDar se jhilmilate hain

ye sab ‘rehana’ ke maasum afsane sunate hain

vo in khanDaron men ik din surat-e-afsana rahti thi

yahi vaadi hai vo hamdam jahan ‘rehana’ rahti thi

mire hamdam ye nakhlistan ik din us ka maskan tha

isi ke kharmai-e-aghosh men us ka nasheman tha

isi shadab vaadi men vo be-bakana rahti thi

yahi vaadi hai vo hamdam jahan ‘rehana’ rahti thi

ye phulon ki hasin abadiyan kashana thiin us ka

vo ik but thi ye saari vadiyan but-khana thiin us ka

vo is firdaus-e-vajd-o-raqs men mastana rahti thi

yahi vaadi hai vo hamdam jahan ‘rehana’ rahti thi

tabahi ki hava is khak-e-rangin tak na aai thi

ye vo khitta tha jis men nau-baharon ki khudai thi

vo is khitte men misl-e-sabza-e-begana rahti thi

yahi vaadi hai vo hamdam jahan ‘rehana’ rahti thi

isi virana men ik din bahishten lahlahati thiin

ghataen ghir ke aati thiin havaen muskurati thiin

ki vo ban kar bahar-e-jannat-e-virana rahti thi

yahi vaadi hai vo hamdam jahan ‘rehana’ rahti thi

ye virana guzar jis men nahin hai karvanon ka

jahan milta nahin nam-o-nishan tak sarbanon ka

isi virane men ik din miri ‘rehana’ rahti thi

yahi vaadi hai vo hamdam jahan ‘rehana’ rahti thi

yahin abad thi ik din mire afkar ki malka

mire jazbat ki devi mire ashar ki malka

vo malka jo ba-rang-e-azmat-e-shahana rahti thi

yahi vaadi hai vo hamdam jahan rehana rahti thi

saba shakhon men nakhlistan ki jis dam sarsarati hai

mujhe har lahr se ‘rehana’ ki avaz aati hai

yahin ‘rehana’ rahti hai yahin ‘rehana’ rahti thi

yahi vaadi hai vo hamdam jahan ‘rehana’ rahti thi

fazaen gunjti hain ab bhi un vahshi taranon se

suno avaz si aati hai un khaki chatanon se

ki jin men vo ba-rang-e-naghma-e-begana rahti thi

yahi vaadi hai vo hamdam jahan ‘rehana’ rahti thi

mire hamdam junun-e-shauq ka izhar karne de

mujhe us dasht ki ik ik kali se pyaar karne de

jahan ik din vo misl-e-ghuncha-e-mastana rahti thi

yahi vaadi hai vo hamdam jahan ‘rehana’ rahti thi

ba-rabb-e-kaba us ki yaad men umren ganva dunga

main us vaadi ke zarre zarre par sajde bichha dunga

jahan vo jan-e-kaaba azmat-e-but-khana rahti thi

yahi vaadi hai vo hamdam jahan ‘rehana’ rahti thi

vo is tiile par akasr ashiqana giit gaati thi

purane surmaon ke fasane gungunati thi

yahin par muntazir meri vo betabana rahti thi

yahi vaadi hai vo hamdam jahan ‘rehana’ rahti thi

khajuron ke hasin saae zamin par lahlahate the

sitare jagmagate the shagufe khilkhilate the

fazaen muntashir ik nikhat-e-mastana rahti thi

yahi vaadi hai vo hamdam jahan ‘rehana’ rahti thi

yahin basti thi ai hamdam mire ruman ki basti

mire afsanon ki duniya mire vijdan ki basti

yahin ‘rehana’ basti thi yahin ‘rehana’ basti thi

yahi vaadi hai vo hamdam jahan ‘rehana’ rahti thi

shamim-e-zulf se us ki mahak jaati thi kul vaadi

nigah-e-mast se us ki bahak jaati thi kul vaadi

havaen par-fishan ruh-e-mai-o-mai-khana rahti thi

yahi vaadi hai vo hamdam jahan ‘rehana’ rahti thi

vo gesu-e-pareshan ya ghataen raqs karti thiin

fazaen vajd karti thiin havaen raqs karti thiin

vo is firdaus-e-vajd-o-raqs men mastana rahti thi

yahi vaadi hai vo hamdam jahan ‘rehana’ rahti thi

gudaz-e-ishq se labrez tha qalb-e-hazin us ka

magar aina-dar-e-sharm tha ru-e-hasin is ka

khamoshi men chhupae naghma-e-mastana rahti thi

yahi vaadi hai vo hamdam jahan ‘rehana’ rahti thi

use phulon ne meri yaad men betab dekha hai

sitaron ki nazar ne raat bhar be-khvab dekha hai

vo sham-e-husn thi par surat-e-parvana rahti thi

yahi vaadi hai vo hamdam jahan ‘rehana’ rahti thi

yahin ham-rang-e-gul-ha-e-hasin rahti thi ‘rehana’

misal-hur-e-firdaus-e-barin rahti thi ‘rehana’

yahin ‘rehana’ rahti thi yahin ‘rehana’ rahti thi

yahin vaadi hai vo hamdam jahan ‘rehana’ rahti thi

payam dard-e-dil ‘akhtar’ diye jaata huun vaadi ko

salam-e-rukhsat-e-ghamgin kiye jaata huun vaadi ko

salam ai vadi-e-viran jahan ‘rehana’ rahti thi

Leave a Comment