kaha us ne main huun tanha udhar saara zamana hai
kaha main ne zamana har tarah ka biit jaana hai
kaha us ne ki tum bhi aur logon ki tarah se ho
kaha main ne tumhara hausla bhi azmana hai
kaha us ne ki ab tak raste mahfuz the lekin
kaha main ne isi lekin ka to saara fasana hai
kaha us ne ki mere ḳhvab men tum saath the mere
kaha main ne ki ḳhvabon ko haqiqat bhi banana hai
kaha us ne ki dekho zulmaton ka saath mat dena
kaha main ne havaon men diya rakh kar jalana hai
kaha us ne ki manzil aur kitni duur hai ‘anvar’
kaha main ne hamen is dhund kai us paar jaana hai
Leave a Reply