Is Liye Kam Kisi Se Milta Hai

is liye kam kisī se miltā hai

ḳhud se mil kar mujhī se miltā hai

chashm-e-girya ko dekhiyegā kabhī

dil kā dariyā isī se miltā hai

jis ko dekhā nahīñ kabhī maiñ ne

terā chehra usī se miltā hai

terī āñkheñ batā rahī haiñ mujhe

ḳhvāb meñ tū kisī se miltā hai

maiñ ne dekhā thā ḳhvāb meñ us ko

vo mirī shā.irī se miltā hai

ā.īna dekhte hī yaad aayā

merā chehra kisī se miltā hai

kuchh to ḳhūbī hai aap meñ ‘tābish’

har koī aap hī se miltā hai

Leave a Comment