gunge lafzon ka ye be-samt safar mera hai
guftugu us ki hai lahje men asar mera hai
main ne kho.e hain yahan apne sunahre shab o roz
dar-o-divar kisi ke hon ye ghar mera hai
mera aslaf se rishta to na toḌ ai duniya
sab mahal tere hain lekin ye khanDar mera hai
aati jaati hui faslon ka muhafiz huun main
phal to sab us ki amanat hain shajar mera hai
mere angan ke muqaddar men andhera hi sahi
ik charagh ab bhi sar-e-rahguzar mera hai
duur tak dar-o-rasan dar-o-rasan dar-o-rasan
aaise halat men jiina bhi hunar mera hai
jab bhi talvar uThata huun ki chheḌun koi jang
aisa lagta hai ki har shane pe sar mera hai
Leave a Reply