Poet
ho jis qadar ki tujh se ai pur-jafa jafa kar
kahta huun main bhi tujh se ai ba-vafa vafa kar
bait-us-sanam men ja kar hamdam ba-rabb-e-ka.aba
laaya huun us sanam ko ghar tak ḳhuda ḳhuda kar
gauhar jo ashk ke hain kuchh chashm ke sadaf men
ghaltan na ḳhaak men kar aansu baha baha kar
marte hain ham to lekin sun teri aamad aamad
ummid ne rakha hai ab tak jala jala kar
tujh ko patang uḌate dekha jo ashiqon ne
kaT mar ke baiThe akasr ghar-var luTa luTa kar
sad-chak dil ka hona har sub.h-dam hamara
gul se tu kah rahi hai bulbul hansa hansa kar
aata hai vo sharabi khane kabab dil ka
kahta hai jhuTi baten kya kya chaba chaba kar
saaqi muaaf rakkho gustaḳhiyan hamari
be-ḳhud kiya nashe men tu ne pila pila kar
bose ka likh ke nusḳha yaquti-e-labon se
bimar-e-ishq tera hai be-dava dava kar
har sub.h chaak ho hai naseh mira gareban
har shaam tu rakhe hai nahaq sila sila kar
aur ik ghazal ‘muhib’ kah bar-qaul ‘mir’-sahib
auron se de ishare ham se chhupa chhupa kar
Leave a Reply