mere ba.ad aur koi mujh sa na aaya hoga
us ke darvaze pe ab tak mira saaya hoga
jab bhi a.ine ne munh us ko chiḌhaya hoga
kaise ḳhvabon ki haqiqat ko chhupaya hoga
us ne bharpur nazar jis pe bhi Daali hogi
chand ne us ko kaleje se lagaya hoga
kis tarah qatl kiya hoga miri yadon ko
kitni mushkil se mujhe us ne bhulaya hoga
jab chali hogi kahin baat kisi sha.ir ki
us ke honTon pe mira naam to aaya hoga
jo mire baare men sochega har ik pahlu se
vo mira apna nahin hoga paraya hoga
us ki palkon ka tabassum ye pata deta hai
us ne ankhon men koi ḳhvab sajaya hoga
sochta huun ki vo insan ba-nam-e-hasti
kaise angaron ki barish men nahaya hoga
zindagi us ki sulagta hua sahra hogi
jo tiri ankhon pe iman na laaya hoga
teri ankhon men samaya hai jo rangon ki tarah
ho na ho mere ḳhayalat ka saaya hoga
tum ne ‘qaisar’ mire ehsas ke virane men
mere ḳhvabon ko taḌapta hua paaya hoga
Leave a Reply