vo jalva-gah-e-naz men jis vaqt aa gae
naz-o-ada se hosh sabhi ke uda gae
dil men vo aa ke hasrat-o-arman jaga gae
ummid ke charagh jala kar bujha gae
is tarah apna jalva-e-zeba dikha gae
aa kar nigah-e-shauq se dil men sama gae
nakhl-e-murad phulon se mera saja gae
vo aa gae to saari baharon pe chha gae
kab tak yunhi dikhaenge ham ko vo sabz-bagh
rasm-e-vafa nibhani thi jin ko nibha gae
ham arz-e-muddaa bhi na kuchh un se kar sake
aaya jo dil men un ke hamen vo suna gae
maalum tha na itne talavvun mizaj hain
vo ho gae unhin ke unhen jo bhi bha gae
soz-e-darun ne kar diya jiina mira haram
ik aag aisi dida-o-dil men laga gae
arman the jitne jal ke sabhi khaak ho gae
dil par vo aisi barq-e-tabassum gira gae
tark-e-taalluqat men un ko lagi na der
auqat meri kya hai mujhe vo bata gae
qaaem khumar us ka hai ‘barqi’ abhi talak
apni nigah-e-naz se vo jo pila gae
Leave a Reply