ye ghumta hua a.ina apna Thahra ke
zara dikha mira rafta tu charḳh palTa ke
hai ka.enat muamma juda tariqe ka
faqat sulajhta hai aapas men girhen uljha ke
natija ek sa nikla dimagh aur dil ka
ki donon haar ga.e imtihan men duniya ke
musafiron se raha hai vo rasta abad
palaT ke aa.e nahin jis se pesh-rau ja ke
ye hijr-zad samajhta hai kam visal ki baat
bata jo ramz-o-kinaya hain ḳhuub phaila ke
ki band rahta hai shahr-e-talab ka darvaza
yaqin aaya mujhe baar baar ja aa ke
ḳhafif ho ke main chehre ko pher leta huun
agar guzarta hai tujh ashna sa katra ke
javab mera ghalat tha saval us ka durust
khula ye mujh pe kisi na-samajh ko samjha ke
Leave a Reply