jis ko dekho vahi avara-o-sauda.i hai
zindagi hai ki kisi dasht ki pahna.i hai
sho.ala-e-gham ko rag-e-jan men kiya jazb to phir
har nazar surat-e-ḳhurshid nazar aa.i hai
Duub kar dil men ubharti hai koi mauj-e-ḳhayal
abr chhaya hai kabhi barq si lahra.i hai
giit ke ruup men paband baharon ki faza
chaman-e-dil men mire aur nikhar aa.i hai
lazzat-e-ishq se bharpur gham-e-dil ki sada
parda-e-shab men ka.i chand uḌa laa.i hai
shabnami aankh se dekho to chaman ki janib
sina-e-gul men shararon ne numu paa.i hai
sochta huun ki zamane se nikal kar aage
phir vahi main huun vahi gosha-e-tanha.i hai
apne hone ki haqiqat ka yaqin hai lekin
aankh kyuun jalva-e-hasti ki tamanna.i hai
ye ajab silsila-e-qaid-e-nazar hai ki ‘nadim’
har nazar apni hi duniya ki tamasha.i hai
Leave a Reply