aap to ishq men dana.i liye baiThe hain
aur divane hain ki rusva.i liye baiThe hain ham
ḳhana-e-hijr men yaden tiri raqsan hongi
ham isi shauq men tanha.i liye baiThe hain
tajraba ham pe taghaful ka na kiije varna
kuchh hunar ham bhi karishma.i liye baiThe hain
ek muddat se vo vahshat hai ki bas kya kahiye
ghar men ham ik dil-e-sahra.i liye baiThe hain
taqviyat azmat-e-kirdar se paa.i hai ki ham
na-tavani men tavana.i liye baiThe hain
taliyan aaj yahan ḳhuub bajengi ‘nusrat’
sab ke sab apne tamasha.i liye baiThe hain
Leave a Reply