Poet
rah gaya dida-e-pur-ab ka saman ho kar
vo jo rahta tha mire saath miri jaan ho kar
jaane kis shoḳh ke anchal ne shararat ki hai
chand phirta hai sitaron men pareshan ho kar
ate-jate hue dastak ka takalluf kaisa
apne ghar men bhi koi aata hai mehman ho kar
ab to mujh ko bhi nahin milti miri koi ḳhabar
kitna gumnam hua huun main numayan ho kar
vo mire sahn men utre hain ujale kahiye
shaam takti hai dar-o-bam ko hairan ho kar
main ne us shaḳhs se sikha hai takallum ka hunar
vo jo mahfil men bhi rahta tha gurezan ho kar
ujḌi ujḌi si hava ḳhak-ba-sar aati hai
shaam utri hai kahin sham-e-ghariban ho kar
ek hangama sa yadon ka hai dil men ‘az.har’
kitna abad hua shahr ye viran ho kar
Leave a Reply