Kyunki Hum Duniya Mein Aae Kuchh Sabab Khulta Nahin

kyunki ham duniya men aae kuchh sabab khulta nahin

ik sabab kya bhed vaan ka sab ka sab khulta nahin

puchhta hai haal bhi gar vo to maare sharm ke

ghuncha-e-tasvir ke manind lab khulta nahin

shahid-e-maqsud tak pahunchenge kyunkar dekhiye

band hai bab-e-tamanna hai ghazab khulta nahin

band hai jis ḳhana-e-zindan men divana tera

us ka darvaza pari-ru roz o shab khulta nahin

dil hai ye ghuncha nahin hai is ka uqda ai saba

kholne ka jab talak aave na Dhab khulta nahin

ishq ne jin ko kiya ḳhatir-girafta un ka dil

laakh hove garche saman-e-tarab khulta nahin

kis tarah malum hove us ke dil ka muddaa

mujh se baton men ‘zafar’ vo ghuncha-lab khulta nahin

Leave a Comment