Dosto Dil Kahin Zinhaar Na Aane Pae

dosto dil kahin zinhar na aane paae

dil ke hathon koi azar na aane paae

kijiye husn-parasti magar is qaid ke saath

pyari surat pe zara pyaar na aane paae

khana-e-yar ghar aafat ka hai ai rahgiro

jism par saya-e-divar na aane paae

ai junun tera zamane men rahe jab tak daur

hosh men ashiq-e-sarshar na aane paae

aap par uqda-e-nazuk-kamari khul jaata

ta-kamar gesu-e-khamdar na aane paae

chashm-e-mahbub se nargis ko barabar na karo

paas bimar ke bimar na aane paae

‘bahr’ kuchh gham na karo dil ke juda hone ka

ab baghal men ye bad-atvar na aane paae

Leave a Comment