Tek Laga Kar baiTha Hun Main Jis buDhi Diwar Ke Sath

Tek lagā kar baiThā huuñ maiñ jis būḌhī dīvār ke saath

ḳhauf hai mujh ko miT na jā.ūñ us ke har āsār ke saath

ġhāza powder mal kar maiñ bhī aa jaatā huuñ surḳhī meñ

bik jaatā hai chehra merā saste se aḳhbār ke saath

kyuuñ na baḌh kar maiñ pī jā.ūñ tere naqlī sab tiryāk

phir tū dhokā kar na paa.e bastī meñ bīmār ke saath

hosh ke nāḳhun le to sā.īñ kyuuñ ye ġhauġhā Daalā hai

dekh nahīñ ab lai ye chaltī naġhma-e-darbār ke saath

kis ne tujh ko sauñpī bhaa.ī sardārī is bastī kī

sab ke sab mahshūr ye hoñge apne apne yaar ke saath

umr tamāmī shauq se ham ne ek hī titlī paalī thī

jab jab us ko ḳhvāb meñ dekhā uḌtī hai aġhyār ke saath

Leave a Comment