suhane sapne aa.e hain
lubhane sapne aa.e hain
mujhe manzil ki davat hai
bulane sapne aa.e hain
miri bedar ankhon ko
sajane sapne aa.e hain
main ik muddat se soya tha
jagane sapne aa.e hain
mujhe paane tum aa.e ho
ganvane sapne aa.e hain
ye sapne ja nahin sakte
churane sapne aa.e hain
ye arman phir se toḌenge
dikhane sapne aa.e hain
naya sa khel hai koi
purane sapne aa.e hain
mujhe to aḳhiri dam tak
hansane sapne aa.e hain
ajab ‘mahtab’ ankhon ke
divane sapne aa.e hain
Leave a Reply