ḳhirad ko gumshuda-e-ku-ba-ku samajhte hain
ham ahl-e-ishq tujhe ru-ba-ru samajhte hain
tire ḳhayal ki ḳhushbu tire jamal ka rang
har ik ko takmila-e-rang-o-bu samajhte hain
koi maqam koi marhala nazar men nahin
kahan hai qafila-e-arzu samajhte hain
butan-e-shahr ko ye e’tiraf ho ki na ho
zaban-e-ishq ki sab guftugu samajhte hain
hazar fitna dar aghosh hai sukun tera
tujhe ham ai dil-e-ashufta-ḳhu samajhte hain
hazar manzil-e-nau yak faragh-e-gumshudagi
ma.al-e-hausla-e-justuju samajhte hain
faqih-e-shahr se kya puchhiye ‘ravish’ ki janab
zaban-e-shisha-o-jam-o-subu samajhte hain
Leave a Reply