dil hai apna ranj-e-furqat men sharik
khud aziyyat khud aziyyat men sharik
hai gham-e-ishq apni qismat men sharik
hai yahi har ek halat men sharik
yaad hai teri har aafat men sharik
kaun hota hai musibat men sharik
ab to dil ke saath meri jaan bhi
ho gai teri mohabbat men sharik
husn-e-kamil ka kamal-e-ishq dekh
kis ko vo karta mohabbat men sharik
nang-aqai hai meri bandagi
aap kyuun huun meri zillat men sharik
ghair phir vo hukm de mere khilaf
kya ye hai teri hukumat men sharik
husn ne ‘raghib’ khud apne ishq ko
kar diya har dil ki raghbat men sharik
Leave a Reply