ye kaun sa parvana mua jal ke lagan men
hairat se jo hai shama ki angusht dahan men
kahte hain use chah-e-zanakhdan ghalati se
bose ka nishan hai ye tire seb-e-zaqan men
vo aina-tan aaina phir kis liye dekhe
jo dekh le munh apna har ik uzv-e-badan men
vo subah ko is dar se nahin baam par aata
naama na koi bandh de suraj ki kiran men
mazmun nahin likhte ham use dagh-e-jigar ka
rakh dete hain laale ki kali khat ki shikan men
ye gard-e-kudurat se pas-e-marg tha dil saaf
dhabba na laga khaak ka bhi mere kafan men
zindan men asiron se ye kahta tha mah-e-misr
ghurbat hi men aram mila aur na vatan men
Leave a Reply