dard ka shahr kahin karb ka sahra hoga
log vaqif the koi ghar se na nikla hoga
vo jo ik shaḳhs ba-zid hai ki bhula do mujh ko
bhuul ja.un to usi shaḳhs ko sadma hoga
aankh khulte hi bichhaḌ ja.ega har manzar-e-shab
chand phir sub.h ke maqtal men akela hoga
jin ujalon ki taraf dauḌ rahi hai duniya
un ujalon men qayamat ka andhera hoga
ek ummid har ik dar pe liye jaati hai
ye mira shahr tha koi to shanasa hoga
Leave a Reply