har avaz zamistani hai har jazba zindani hai
kucha-e-yar se dar-o-rasan tak ek si hi virani hai
kitne koh-e-giran kaate tab subh-e-tarab ki diid hui
aur ye subh-e-tarab bhi yaaro kahte hain begani hai
jitne aag ke dariya men sab paar hamin ko karna hain
duniya kis ke saath aai hai duniya to divani hai
lamha lamha khvab dikhae aur sau sau taabir kare
lazzat-e-kam-azar bahut hai jis ka naam javani hai
dil kahta hai vo kuchh bhi ho us ki yaad jagae rakh
aql ye kahti hai ki tavahhum par jiina nadani hai
tere pyaar se pahle kab tha dil men aisa soz-o-gudaz
tujh se pyaar kiya to ham ne apni qimat jaani hai
aap bhi kaise shahar men aa kar shair kahlae hain ‘alim’
dard jahan kamyab bahut hai naghmon ki arzani hai
Leave a Reply