Kausar Siddiqi
bujh chuki aag magar ab bhi jalan baaqi hai
meri ankhon men shab-e-gham ki chubhan baaqi hai
kanch ke zarf zaruri nahin piine ke liye
ab bhi miTTi ke pyalon ka chalan baaqi hai
hone vaala hai shab-e-gham ka savera lekin
ab bhi ankhon men andheron ki ghuTan baaqi hai
kab fasilon ne havaon ke safar ko roka
phir bhi divar ka zindan men chalan baaqi hai
kitne aram se sota hai safar kar ke magar
qabr kahti hai musafir ki thakan baaqi hai
luT ga.i apne asase ki har ik shai lekin
bas buzurgon ki duaon se vatan baaqi hai
raat kaT ja.egi asar nahin hain ‘kausar’
phir bhi ummid ki halki si kiran baaqi hai
Leave a Reply