ham ḳhuda the na ḳhuda.i apni
kya bayan karte baḌa.i apni
bas tira dhyan mujhe aaya tha
phir kabhi yaad na aa.i apni
sab pahunch men hain magar kya kahiye
kis ke dil tak hai rasa.i apni
dil men laa.e tire ḳhvabon ka ḳhayal
ham ne ḳhud niind uḌaa.i apni
tum ye kah do chalo ham haar ga.e
ḳhatm ki main ne laḌa.i apni
kaun samjhega ye aansu hain guhar
kyon luTate ho kama.i apni
Leave a Reply