Khaleel Mamoon
na niind hai na ḳhvab hai na yaad hai na raat hai
zamin na asman hai zaman na ka.enat hai
ye jism-o-jan ka qafila hai rasta pe kaun se
na manzilon ki aas hai na rahravon ka saath hai
umiid o aarzu ke rang kyuun phike lag rahe hain ab
kami hai ab-o-gil men kuchh lahu men koi baat hai
hai un ke vaste tamam fat.h-o-kamraniyan
mire liye hamesha se jo hai to sirf maat hai
main lahza lahza kaT ke gir raha huun andhi khaa.i men
ye zindagi ka rasta nahin hai pul-sirat hai
hai vasl apne-ap se firaq apne-ap se
nahin hai koi bhi yahan bas ek meri zaat hai
‘mamun’ azal se ta-abad nahin hai koi raushni
ḳhala men duur duur tak bas ik aziim raat hai
Leave a Reply