Agarche Wusat-E-Imkan Nazar Mein chhoD Gaya

Poet

agarche vus.at-e-imkan nazar men chhoḌ gaya

safar ka shauq ghubar-e-safar men chhoḌ gaya

kuchh aise guzra hai pagal hava ka ik jhonka

ajiib ḳhauf sa ik ik shajar men chhoḌ gaya

bichhaḌte vaqt jo us ne kaha tha chupke se

vo ek lafz mujhe rahguzar men chhoḌ gaya

na ahaTen na sada.en na dastaken na umiid

na jaane kaun tha kuchh bhi na ghar men chhoḌ gaya

ubharte Dubte guzri tamam shab ‘anjum’

udaas chand mujhe kis bhanvar men chhoḌ gaya