Mohsin Asrar
jab vahime avaz ki buniyad se nikle
ghabra.e hue ham suḳhan-abad se nikle
samton ka ta.ayyun to sitaron se hua hai
lekin ye sitare miri fariyad se nikle
main baiTh gaya ḳhaak pe tasvir banane
jo kibr the mujh men vo tiri yaad se nikle
ḳhud ko main bhala zer-e-zamin kaise dabata
jitne bhi khanDar nikle vo abad se nikle
dil pahuncha achanak hi tayaqqun ki faza tak
sab vahm-o-guman ishq ki asnad se nikle
main dars use ab koi deta bhi to kaise
pahle se use saare sabaq yaad se nikle
Leave a Reply