Rauf Raheem
ek sha.ir ka huun mehman ḳhuda ḳhair kare
us ke hathon men hai divan ḳhuda ḳhair kare
main huun laghar vo pahlavan ḳhuda ḳhair kare
meri aafat men phansi jaan ḳhuda ḳhair kare
niind men chiḳhta rahta hai vo chauvva chhakka
us pe cricket ka hai shaitan ḳhuda ḳhair kare
mujh se begam ka taqabul to faqat itna hai
main diya huun to vo tufan ḳhuda ḳhair kare
ghar men chaval hai na aaTa hai na adrak lahsan
phir bhi picture ka hai arman ḳhuda ḳhair kare
chheḌ kar aaya tha jis shoḳh hasina ko abhi
bhaa.i us ka hai pahlavan ḳhuda ḳhair kare
peT men aant nahin munh men koi daant nahin
us pe shadi ka hai saman ḳhuda ḳhair kare
kitni ghazlon ko ḳhuda jaane suna.enge ‘rahim’
hain tarannum men jo ghaltan ḳhuda ḳhair kare
Leave a Reply