Jameeluddin Aali
haqiqaton ko fasana bana ke bhuul gaya
main tere ishq ki har choT kha ke bhuul gaya
zara ye duri-e-ehsas-e-husn-o-ishq to dekh
ki main tujhe tire nazdik aa ke bhuul gaya
ab us se baḌh ke bhi varaftagi-e-dil kya ho
ki tujh ko ziist ka hasil bana ke bhuul gaya
guman jis pe raha manzilon ka ik muddat
vo rahguzar bhi manzil men aa ke bhuul gaya
ab aisi hairat-o-varaftagi ko kya kahiye
dua ko haath uTha.e uTha ke bhuul gaya
dil-o-jigar hain ki garmi se pighle jaate hain
koi charagh-e-tamanna jala ke bhuul gaya
Leave a Reply