firaq-mausam ke asman men ujaaḌ taare juḌe hue hain
nadi ke daman men hansrajon ke sard lashe gire hue hain
chamakte mausam ka rang phaila tha jis se ankhen dhanak hui thiin
aur ab basarat ki narm miTTi men thuur kanTe uge hue hain
tire dariche ke ḳhvab dekhe the raqs karte hue dinon men
ye din to dekho jo aaj nikla hai dast-o-pa sab kaTe hue hain
ḳhumar kaisa tha ham-rahi ka shumar ghaḌiyon ka bhuul baiThe
tire nagar ke faqir ab tak us ek shab men ruke hue hain
use adavat thi us saba se jo mere chehre ko chhu guzarti
vo ab nahin hai to apne angan men lu ke Dere lage hue hain
rahoge thame yunhi ye chaukhaT agarche ik bhi nazar na Dalun
hansao mat ghar ko lauT jaao ye raag mere sune hue hain
kahan ruke the vo kya shajar the ki jin ke saa.e men ham khaḌe the
vo dhuup kaisi thi jis ki barish se mere sahra hare hue hain
Leave a Reply