vo tere gham ko pahchane nahin hain
abhi apnon men begane nahin hain
hazaron mahfilen aisi hain jin men
hamare gham ke afsane nahin hain
jo bhar jaa.en vo paimane hi samjho
jo ḳhali hain vo paimane nahin hain
tire kuche ki raunaq hai hamin se
tire kuche men divane nahin hain
zara ban-Than to le ai zindagani
bara.e-husn virane nahin hain
jahan-e-dilruba.i allah allah
jahan tum ho to farzane nahin hain
vahan hi talḳhiyan piita raha huun
jahan ai ‘daur’ maiḳhane nahin hain
Leave a Reply