bana ke ik na.i manzil guzar ga.e hote
jidhar koi nahin jaata udhar ga.e hote
pa.e sukun na agar ham Thahar ga.e hote
to aaj ta-had-e-shams-o-qamar ga.e hote
gham-e-hayat se ham bhi jo Dar ga.e hote
to qaid-e-zist men rah ke bhi mar ga.e hote
jo mai-kade men zara tum Thahar ga.e hote
nazar ke zor se paimane bhar ga.e hote
na lafz gul ko samajhte na ḳhaar ke ma.ani
bacha bacha ke jo daman guzar ga.e hote
main bevafa huun to vo kyuun nazar chura ke ga.e
zara mila ke nazar se nazar ga.e hote
nasim-e-sub.h ke jhonke miri taraf kyuun aa.e
jahan bahar hai gul hain udhar ga.e hote
batata kaun nasheb-o-faraz-e-rah-e-hayat
jo sab ki tarah se ham bhi guzar ga.e hote
bahana chahiye gulshan men Darne valon ko
na ḳhaar hote to phulon se Dar ga.e hote
main aur kuchh nahin kahta magar chaman vaalo
bahar aati to gulshan sanvar ga.e hote
jo ittihad ki manzil pe hote ham ‘sharib’
taghayyurat ke chehre utar ga.e hote
Leave a Reply