kuchh bol guftugu ka saliqa na bhuul jaae
shishe ke ghar men tujh ko bhi rahna na bhuul jaae
va rakh sada daricha-e-khud-agahi ki tu
achchhe to kya buron ko parakhna na bhuul jaae
zakhm-e-nihan ko shauq-e-talab se juda na kar
hota hai roz o shab jo tamasha na bhuul jaae
kar den na be-talab ye musalsal aziyyaten
dil bhi kahin vafa ka saliqa na bhuul jaae
manzil ka nashsha qurbat-e-manzil na chhin le
apni gali men aa ke hi rasta na bhuul jaae
mat rakh tazad-e-zahir-o-batin ki aadmi
tujh ko tire amal se parakhna na bhuul jaae
vo bhiid hai ki shahr men chalna muhal hai
ungli pakadna baap ki bachcha na bhuul jaae
‘nahid’ rifaten to milengi bahut magar
ankhon ko apne shahr ka naqsha na bhuul jaae