Abrar Ahmad
be-faiz saaton men
munh-zor mausamon men
khud se kalam karte
ukhdi hui tanabon
din-bhar ki sakhtiyon se
ukta ke so gae the
barish thi be-nihayat
mitti se uth rahi thi
khushbu kisi vatan ki
khushbu se jhankte the
galiyan makan dariche
aur bachpane ke angan
ik dhuup ke kinare
asaishon ke maidan
udte hue parinde
ik ujle asman par
do nim-baz ankhen
bedariyon ki zad par
ta-hadd-e-khak udte
be-samt be-irada
kuchh khvab fursaton ke
kuchh naam chahaton ke
kin paniyon men utre
kin bastiyon se guzre
thi sub.h kis zamin par
aur shab kahan pe aai
mitti thi kis jagah ki
udti phiri kahan par
is khak-dan pe kuchh bhi
daaim nahin rahega
hai paanv men jo chakkar
qaaem nahin rahega
dastak thi kin dinon ki
avaz kin ruton ki
khana-ba-dosh jaage
khemon men ud rahi thiin
ankhon men bhar gai thi
ik aur shab ke ninden
aur shahr-e-be-aman men
phir sub.h ho rahi thi
Leave a Reply