Qateel Shifai
yaaro kahan tak aur mohabbat nibha.un main
do mujh ko bad-dua ki use bhuul ja.un main
dil to jala kiya hai vo sho.ala sa aadmi
ab kis ko chhu ke haath bhi apna jala.un main
sunta huun ab kisi se vafa kar raha hai vo
ai zindagi ḳhushi se kahin mar na ja.un main
ik shab bhi vasl ki na mira saath de saki
ahd-e-firaq aa ki tujhe azma.un main
badnam mere qatl se tanha tu hi na ho
la apni mohr bhi sar-e-mahzar laga.un main
utra hai baam se koi ilham ki tarah
ji chahta hai saari zamin ko saja.un main
us jaisa naam rakh ke agar aa.e maut bhi
hans kar use ‘qatil’ gale se laga.un main
Leave a Reply