Ye Qudrat Ke Hathon Ke Dilkash Sanam

ye qudrat ke hāthoñ ke dilkash sanam

kahīñ dekh kar but na ban jaa.eñ ham

mirā dil baḌī qīmtī chiiz hai

muqīm is meñ hai ek aalam kā ġham

mohabbat se ḳhālī nahīñ koī dil

mohabbat har ik dil meñ hai besh-o-kam

sitam ko karam kah rahā hai jahāñ

zarā dekhiye to jahāñ kā sitam

agar dil meñ rangīniyāñ hī na hoñ

to sair-e-jināñ bhī hai sair-e-adam

mere zehn meñ haiñ ka.ī manzileñ

abhī mutma.in hoñ na mere qadam

hue nāmvar hāsidoñ ke tufail

jahāñ meñ the ‘parvez’ gum-nām ham

Leave a Comment