ye qudrat ke hathon ke dilkash sanam
kahin dekh kar but na ban jaa.en ham
mira dil baḌi qimti chiiz hai
muqim is men hai ek aalam ka gham
mohabbat se ḳhali nahin koi dil
mohabbat har ik dil men hai besh-o-kam
sitam ko karam kah raha hai jahan
zara dekhiye to jahan ka sitam
agar dil men ranginiyan hi na hon
to sair-e-jinan bhi hai sair-e-adam
mere zehn men hain ka.i manzilen
abhi mutma.in hon na mere qadam
hue namvar hasidon ke tufail
jahan men the ‘parvez’ gum-nam ham
Leave a Reply