Shaz Tamkanat
bahut dinon se hai ji men saval puchhunga
main tere aa.ine se tera haal puchhunga
bahut hasin hai ye duniya magar zaval ke saath
ḳhuda se hashr men husn-e-zaval puchhunga
sukut-e-sham se kyuun nisbat-e-tabi.at hai
sukut-e-sham se vaj.h-e-malal puchhunga
tu be-misal hai teri misal kya puchhun
main kuchh nahin magar apni misal puchhunga
mira ḳhayal hai meri nigah men hai jamal
tire jamal ka kya hai ḳhayal puchhunga
ḳharab aks hain shisha-ba-dast kyuun saaqi
qusur-e-bada-e-jam-e-sifal puchhunga
faza udaas hai jangal ki saa.en saa.en hai ‘shaz’
main kis se vahshat-e-chashm-e-ghazal puchhunga
Leave a Reply