ankhen hain surḳh honT siyah rang zard hai
har shaḳhs jaise mere qabile ka fard hai
jab main na tha to meri zamane men guunj thi
ab main huun aur saare zamane ka dard hai
suraj men aaj jitni tapish hai kabhi na thi
kya kijiye ki ḳhuun hi rag o pai men sard hai
ham kis safar pe nikle ki shaklen badal ga.iin
chehre pe jis ke dekho masafat ki gard hai
chalta rahe jo abla-pa.i ke bavajud
manzil ka mustahiq vahi sahra-navard hai
aisa na ho sahar meri bina.i chhin le
bedariyon se ab miri ankhon men dard hai
bikhra hua huun ḳhvahish-o-hasrat ke darmiyan
jaise mira vajud abhi fard fard hai
Leave a Reply