naddi ye jaise mauj men dariya se ja mile
tum se kahin milun main agar rasta mile
milti hai ek saans ki mohlat kabhi kabhi
shayad ye raat bhi tiri subhon se ja mile
jo bhi mila vo apni ana ka asiir tha
insan ko DhunDne men gai to khuda mile
is ahd-e-intishar men kya ittifaq hai
dard-o-alam ye ranj-o-malal ek ja mile
dil men zara khulus na mehr-o-vafa ka rang
rasman bahut aziiz bahut aqraba mile
meri shikast men mire kuchh mehrban bhi the
meri safen jo chhod ke dushman se ja mile
us samt se bhi guzre nai rut ka karvan
gharon ke basiyon ko bhi taaza hava mile
‘janan’ ye zindagi ke ajab sanehat hain
kuchh log apne-ap se aksar khafa mile