Haris Bilal
bas ek baar falak se ishara ho jaa.e
phir us ke ba.ad bhale jo ḳhasara ho jaa.e
ajab faza hai ki tahqiq us pe hai mauquf
jo ho chuka hai vo ham se dobara ho jaa.e
hatheliyon se halaq men utarta jam-e-visal
kisi gilas men Dalen to khara ho jaa.e
bas itna duur rahunga ki tujh ko dekh sakun
kuchh itna duur ki mera guzara ho jaa.e
ye jitni raushni sadiyon men jazb kar chuki hai
zamin chand ko le kar sitara ho jaa.e
ajab nahin koi tujh sa bana diya jaa.e
ajab nahin hai ki tu aur pyara ho jaa.e
ye taqchon men rakhe sab charagh suraj hain
agar vo chand sa chehra hamara ho jaa.e
Leave a Reply