ye nahin kahta ki dobara vahi avaz de
koi asani to paida kar koi avaz de
main use sun kar bhi aane ka nahin majbur huun
phir bhi apne ḳhvab-ḳhane se kabhi avaz de
ho sake donon zamanon men ham-ahangi koi
main purana huun to kya mujh ko na.i avaz de
maut ke sahil par istada huun to mujh ko kahin
zindagi ke paniyon men Dubti avaz de
Thiik hai tu ne pukara hoga jis-tis ko magar
mere hisse men koi aa.i hui avaz de
bin bulaya hi chala a.unga main shayad kabhi
lekin itne shor men to aap bhi avaz de
main use pahchan hi pa.un na pahli baar to
koi avazon ke jangal men ghiri avaz de
munh se kuchh kah to sahi is ḳhamushi ke ar-par
mustaqil ko chhoḌ koi sarsari avaz de
tu ne to har haal men sunna hai ab tujh ko ‘zafar’
raushni avaz de ya tirgi avaz de
Leave a Reply