Ye Nahin Kahta Ki Dobara Wahi Aawaz De

ye nahīñ kahtā ki dobāra vahī āvāz de

koī āsānī to paidā kar koī āvāz de

maiñ use sun kar bhī aane kā nahīñ majbūr huuñ

phir bhī apne ḳhvāb-ḳhāne se kabhī āvāz de

ho sake donoñ zamānoñ meñ ham-āhañgī koī

maiñ purānā huuñ to kyā mujh ko na.ī āvāz de

maut ke sāhil par istāda huuñ to mujh ko kahīñ

zindagī ke pāniyoñ meñ Dūbtī āvāz de

Thiik hai tū ne pukārā hogā jis-tis ko magar

mere hisse meñ koī aa.ī huī āvāz de

bin bulāyā hī chalā ā.ūñgā maiñ shāyad kabhī

lekin itne shor meñ to aap bhī āvāz de

maiñ use pahchān hī pā.ūñ na pahlī baar to

koī āvāzoñ ke jañgal meñ ghirī āvāz de

muñh se kuchh kah to sahī is ḳhāmushī ke ār-pār

mustaqil ko chhoḌ koī sarsarī āvāz de

tū ne to har haal meñ sunñā hai ab tujh ko ‘zafar’

raushnī āvāz de yā tīrgī āvāz de

Leave a Comment