Tasneem Abidi
is aa.ine se nikal aur ḳhud ko tanha kar
kabhi to samne aa ke koi tamasha kar
main duur hoti chali ja rahi huun markaz se
mujhe sameT mire da.ere ko chhoTa kar
hujum-e-kizb-o-riya se bacha le aa ke zara
vajud-e-sidq-o-safa men mujhe akela kar
har ek baat bayan karne ki nahin hoti
jo an-kahi rahe us baat ko bhi samjha kar
nahin hai kuchh bhi man-o-tu ka imtiyaz yahan
ḳhud apni zaat se bahar nikal ke socha kar
Leave a Reply