Is Tilsim-e-Roz-O-Shab Se To Kabhi Niklo Zara

Abdul Hafiz Naeemi

is tilsim-e-roz-o-shab se to kabhi niklo zara

kam se kam vijdan ke sahra hi men ghumo zara

naam kitne hi likhe hain dil ki ik mehrab par

hoga in men hi tumhara naam bhi dhundo zara

bad-gumani ki yahi ghairon ko kaafi hai saza

muskura kar phir usi din ki tarah dekho zara

vaqt ke patthar ke niche ik daba chashma huun main

aao pyaso mil ke ye patthar uthao to zara

husn ik dariya hai sahra bhi hain us ki raah men

kal kahan hoga ye dariya ye bhi to socho zara

do kalon ke biich men ik aaj huun uljha hua

meri is kam-fursati ke karb ko samjho zara

vusat-e-kaun-o-makan bhi ab hui jaati hai tang

aur bhi kuchh ai junun vaalo abhi simto zara

thak gae hoge bahut pur-pech thi chahat ki raah

aao meri god men sar rakh ke susta lo zara

ek mitte lafz ke bhi kaam aa jaao kabhi

sang-e-dil par mitne se pahle mujhe likh lo zara

hai taaqub men ‘naimi’ saaya sa ik roz o shab

dost hi shayad ho koi mud ke to dekho zara