nafrat jo hai dil men lab-e-ḳhandan men nahin hai
jo baat hai mazmun men vo unvan men nahin hai
kya janiye kal pichhle pahar kaisi hava thi
ḳhushbu ka pata aaj gulistan men nahin hai
ai masjid-e-aqsa tu jale aur main dekhun
kya azm-e-tahaffuz bhi nigahban men nahin hai
matlub hai vo jins jo nayab bahut hai
us chiiz ki ḳhvahish hai jo imkan men nahin hai
jo soch sake mere liye meri tarah se
vo shaḳhs mire halqa-e-yaran men nahin hai
ai ‘rashk’ ho jis se dil-e-dariya mutalatum
aisa koi andaz hi tufan men nahin hai
Leave a Reply