Ajib Rona Sisakna Nawah-E-Jaan Mein Hai

ajiib ronā sisaknā navāh-e-jāñ meñ hai

ye aur kaun mire saath imtihāñ meñ hai

ye raat guzre to dekhūñ taraf taraf kyā hai

abhī to mere liye sab kuchh āsmāñ meñ hai

kaTegā sar bhī isī kā ki ye ajab kirdār

kabhī alag bhī hai shāmil bhī dāstāñ meñ hai

tamām shahr ko mismār kar rahī hai huā

maiñ dekhtā huuñ vo mahfūz kis makāñ meñ hai

na jaane kis se tirī guftugū rahī ‘bānī’

ye ek zahr ki ab tak tirī zabāñ meñ hai

Leave a Comment